Untung Ndik Tetijak

Suatu hari si Hongo dan Henge disuruh mbok Rodah ncari buluh. Maklum hak, mbok Rodah ni ndak molah suman untuk bejualan di pasar batu. Jadi pegi hak sida bedua ni bejalan betis ke Rondong Demang, soalnya disitu maha banyak tumbuh puhun buluh di pinggir jalan.


Singkat kesah, akhirnya Hongo dengan Henge ni sampai jua di lokasi puhun buluh. Pas bejalan nuju puhun buluh, si Hongo telihat ada tompokan benda tegak lompor kereng.


"Wadak! Apa banyak lompor bawah puhun buluh ni? Dikit maha aku tetijak," bunyi Hongo.


"Leh. Lainnya lompor pang tu! Tu namanya taa.. hi," sahut Henge sambil ketawa.


"Lain leh. Lompor ni. Torokan kah?!" bunyi Hongo lagi.


Karena bekaisan ndikda pupus-pupusnya, Hongo dengan Henge ni sepakat untuk nyelidiki benda apa gerang tu sebujurnya. Dengan gaya tegak penyidik kasus kriminal, si Hongo ngalak sedikit benda yang dicurigai tu.


Si Hongo mehawasi parak-parak benda tu. "Mun bentuk, memang tegak tahik, Nge," bunyinya.


Si Henge lalu njawati benda tu. "Mun dijawat memang agak lemah, sama tegak lompor atau tahik, Ngo!"


Si Hongo lalu ncolet sedikit benda tu, lalu marakkan ke hidung. "Mun dicium, baunya memang tegak tahik, Nge," bunyi Hongo dengan muha masam.


"Tu kan. Apa bunyiku. Awak ngais pang," sahut si Henge.


Tapi karena maseh ndik yakin, si Hongo ni ncoba jelat benda tu untuk memastikan tegak apa kira-kira rasanya.


"Ooo.. lopat! Pffttt! Pffffttt!! Bujur memang tahik ni. Untung aku ndik tetijak tadi, Nge!!!" bunyi Hongo sambil meludah-ludah ke tanah.


Si Henge nepok dahi maha lagi pas ndengar Hongo nyebut tegak tu.


Menurut kita, apa hikmah dari kesah ni mbok ngan busu? Hehehe...